YouthVoice: «Ամուր Միասին» Բարեգործական ՀԿ․ Կազմակերպություն ստեղծված պատերազմական օրերին

«Ամուր Միասին» Բարեգործական ՀԿ․ Կազմակերպություն ստեղծված պատերազմական օրերին

Youth Voice
Հունվար 14, 2021
( )
( 421 )

-Ինչպե՞ս ստեղծվեց Ձեր Կազմակերպությունը

Կազմակերպության ստեղծումը պայմանավորված էր պատերազմական իրավիճակով։ Ես, Ալեն Գասպարյանը, Արման Գառնիկյանը, Լիլի Զախարենկոն, Արթուր Մանուկյանը և Պատրիկ Շահբանդարյանը սկզբում գործում էինք Ամուր միասին նախաձեռնության անունով , սակայն որոշեցինք ինստիտուցիոնալ հիմքերի վրա դնել մեր գործունեությունը և բացեցինք համանուն ՀԿ։ Մեզ անվանում էին «Հրապարակի կամավորներ», քանի որ հիմնականում օգնությունը հավաքագրում էինք Հրապարակի այգում։ Առաջին օրերին մտածում էինք՝ մի քանի օր օգնություն կհավաքագրենք, կավարտվի: Ցավոք, պատերազմը շարունակվում էր. անհրաժեշտ էր գործունեությունը շարունակել, մարդիկ էլ շատ դրական էին արձագանքում մեր նախաձեռնությանը

-Ինչպիսի՞ գործունեություն է ծավալել Կազմակերպությունը։

Ինչպես գրեթե բոլոր նախաձեռնությունները և կազմակերպությունները, մենք ևս իրականացնում էինք սննդի, հագուստի, դեղորայքի հավաքագրում և կապը կապում էինք անմիջապես Պաշտպանության, Առողջապահության և Աշխատանքի և սոցիալական հարցերի նախարարության հետ։ Օգնություն հավաքագրում էինք ըստ կարիքի և փոխանցում ՊՆ-ին, իսկ ժամանակավոր կացարանների հայթայթման հարցում աջակցում էինք Աշխատանքի և սոցիալական հարցերի նախարարությանը՝ միաժամանակ կապ հաստատելով նաև այն անհատների հետ, ովքեր պատրաստ էին աջակցել կացարանների տրամադրման հարցում։ Այդ կապերի և համագործակցությունների շնորհիվ 10 օրում կարողացանք գտնել 500 կացարան: Բացի թիկունքում աշխատելուց, օգնություն էինք ուղարկում նաև սահման։ Այն մարդկանց , ովքեր ցանկանում էին մեզ օգնել, առաջին օրերին խնդրում էինք համապատասխան իրերը գնել՝ մեզ փոխանցել, սակայն, երբ արդեն փոխվստահության մթնոլորտ ստեղծվեց, ստանում էինք նաև գումարային փոծանցումներ Կազմակերպության հաշվեհամարին և ըստ կարիքի օգտագործում։

-Ինչպիսի՞ն էր հասարակության արձագանքը Ձեր նախաձեռնության նկատմամբ, արդյո՞ք ստացվում էր անհրաժեշտ օգնությունը հավաքագրել։

Այո, այդ օրերին արձագանքը բավականին ոգևորող էր։ Օգնություն և աջակցություն ստանում էինք թե՛ կազմակերպություններից, թե՛անհատներից, թե՛ շարքային քաղաքացիներից, թե՛ Սփյուռքից։ Մասնավորապես ցանկանում ենք շնորհակալություն հայտնել «Տերյան մշակութային կենտրոն» ՀԿ-ին համագործակցության համար, և Օլյա Հակոբյանին անհատական մակարդակով մեր գործունեությանը աջակցելու համար, ինչպես նաև Ռուսասատանի հայ համայնքին բժշկական պարագաներ՝ լարաններ, ուղարկելու համար։
Այժմ ևս զբաղվում ենք նույն գործունեությամբ, քանի որ հետպատրեազմյա խնդիրները չեն վերջացել. դեռ կա կացարանների, հագուստի և սննդի կարիք: Իսկ նրանք, ովքեր ցանկանում են մեզ օգնել կամ համագործակցել, կարող են կապվել մեզ հետ մեր ֆեյսբուքյան և ինստագրամյան էջերի միջոցով։

Հարցազրույց «Ամուր Միասին Բարեգործական» ՀԿ-ի անդամ Վահե Աբազյանի հետ։